ප්‍රියන්ත තව ටිකක් උස ගියා නම් කොහොමද?

මේ කුඩා මිනිසා හැකියාව අතින් දැවැන්තය. රංගනයෙන් ඊට නොදෙවැනිය. විවිධ චරිත ඔස්සේ හැකියාව විහිද වූ ඔහු මෑතකාලීනව වඩාත්ම කතාබහට ලක් වුණේ පබළු හි බෙනා මාමා නිසාය.
ඒ ප්‍රියන්ත සෙනෙවිරත්නයි.
ඔහු වෘත්තියෙන් ගුරුවරයකි. එහෙත් අතිශය කාර්යබහුල තැනැත්තෙකු වි දර්ශන තල කිහිපයක මෙන්ම වේදිකාවේ මිනිසා, සකිසද මඬල සහ සාරංගා නැවෙන් ඇවිත් නිර්මාණ ඔස්සේත් හෙතෙම රට වටා සැරිසරයි.
පබළු ටෙලි නාට්‍යය නිමා වී දැනට ටික කාලයක් වනවා. ඒත් ‘බෙනා මාමාගේ’ ජනප්‍රියත්වය අඩු වෙලා නැහැ නේද?
පබළු තිර කතා රචක මහේෂ් රත්සර මද්දුම ආරච්චි තමයි ‘බෙනා මාමා’ මුලින්ම මැව්වේ. ඔහුත් පබළු අධ්‍යක්ෂ ශාන්ත සොයිසාත් බෙනා මාමාගේ චරිතය ගැන යම් කිසි පැහැදිලි කිරීමක් කරලා, මගෙනුත් අඩු වැඩි වශයෙන් අදහස් එකතු කොට රඟපාන්න කිව්වා. මං හීනෙකින්වත් හිතපු නැති තරමේ ජනප්‍රියත්වයක් බෙනා මාමා සතු කර ගත්තා. ඔබ කිව්වා වගේ තවමත් බෙනා මාමාගේ ජනප්‍රියකම චුට්ටක්වත් පහතට වැටිලා නැති බව දැනෙනවා. කවුරුත් වයස් බේදයකින් තොරව කට ඇරලා මට කතා කරන්නේ බෙනා මාමා කියලා.
බෙනා මාමා නිසා ඔබට අමතක නොවන සිදුවීම් රැසකට මුහුණ පාන්න සිදු වුණු බවට මට දැනගන්නට ලැබුණා. ඉන් එකක් දෙකක් මේ වෙලාවේ මතක් කළොත්?
මේ සිද්ධිය වුණේ ගුරු දිනය දවසක, මම උගන්වන ගල්කිස්ස විද්‍යා විද්‍යාලයේදී. ස්ටාෆ් රූම් එකේ ඉඳලා මට උගන්වන්න යා යුතුව තිබුණු පංතිය වෙත යමින් හිටියේ. තුනේ හතරේ පංතිවල ළමුන් රෑනක් බුලත් අත් එහෙම රැගෙන මං ඉදිරියට දුවගෙන ආවා.
අනේ මේ අපේ බෙනට් සර්නේ, වඳිමු වඳිමු කියලා. මේ පුංචි එවුන් ටික හරි හරියට මට වඳින්න පටන් ගත්තා. අන්තිමේට මං ඒ අයට කිව්වා මගෙ නම බෙනට් නෙවේ ප්‍රියන්ත කියලා. කොහෙද, පිළිගත්තෙම නැහැ.
සමහර අයට බෙනා මාමා කියන නමත් වරදිනවනේ. එක දවසක් මැදි වියේ තැනැත්තියක් මගෙ ළඟට ඇවිත් ඇහැව්වා ඔයා නේද ඩෙඟා මාමා කියලා.ඩෙඟා නෙවේ නිවැරැදි නම බෙනා යන බවට මං පැහැදිලි කර දුන්නා. හදිසියේම මා දුටුවහම ඇයට වචන ටිකත් පැටලිලා.
මෑතකාලීනව සිට ඔබේ රංගනයන් සීමාව ඉක්මවනවා කියලා ඇතැම් අය චෝදනා කරනවා.
වෙන්න පුළුවන්. ඔය චෝදනාව මං ප්‍රතික්ෂේප කරන්නේ නැහැ. සමහර චරිත ඕවර් ඇක්ට් කළේ නැත්නම් සාර්ථක වන්නේ නැති බවයි මාගේ හැඟීම. බෙනා මාමාත් ඕවර් ඇක්ට් එකක්. චරිතයකට ඕවර් ඇක්ටිං අවශ්‍ය වෙන වෙලාවල් තියෙනවා. අනික සැබෑ ජීවිතයේ හමු නොවන චරිතයකට නම් ඕවර් ඇක්ටිං එක තිබෙනවා නම් හොඳයි.
ඔබ වෘත්තියෙන් ගුරුවරයෙක්. ඒ වගේම බොහොම කාර්යය බහුල රංගන ශ්ිල්පියෙක්. මේ තත්ත්වයන් මත නිවසේ රැෙඳන කාලය අඩුයි. ඔබේ නෝනා මහත්තයා රංඩු වෙන්නේ එහෙම නැද්ද ඒ ගැන පවසමින්?
ඕනෑම කාන්තාවක් කැමැතියි තමන්ගේ ස්වාමි පුරුෂයා ගෙදර ඉන්නවා නම්. ඒත් මට එහෙම බැහැ. මගෙ බිරිය, කාංචනා කාරිප්පෙරුම මාව හොඳින් තේරුම් ගත් අයෙක්. ඇයත් වෘත්තියෙන් ගුරුවරියක්. මගේ ළමයි දෙන්නගෙත් වැඩ කරගෙන, මගෙ කටයුතුවලටත් නොපසුබටව උදව් කරමින් ඇය කරනා මේ මෙහෙයට ස්තුති කරන්න ඕනේ. ඇය මට දෙන සහය නිසයි මෙතරම් නිදහසකින් මගේ වැඩ කටයුතු කරගෙන ඉන්නේ.
ගුරුවරයකු විදිහට සේවය කරද්දී ඔබ ලබාගෙන ඇති ජනප්‍රියත්වය මොන වගේ බලපෑමක් ද එල්ල කරන්නේ?
මගේ සේවා කාලය මේ වන විට වසර දහ අටක් ඉක්මවලා තියෙන්නේ.
මේ කාලය තුළදී ප්‍රියන්ත සෙනෙවිරත්න නැමැති නළුවා කිසිම දිනක ශිෂ්‍යයන් ඉදිරියේ පෙනී ඉඳලා නැහැ. මගේ ගෝල බාලයන්ට මං ගුරුවරයකු පමණයි. දහය, එකොළම පංතිවලට නිර්මාණකරණය සහ තාක්ෂණවේදයයි මං උගන්වන්නේ. ඒ විෂය කලාවට කොහෙත්ම සම්බන්ධයකුත් නැහැනේ. ළමයින්ට මාව දැන් ගොඩක් හුරුයි. ඒ වගේම මං දඬුවම් කරන්නෙත් නැහැ. හැබැයි ඔවුන් මං කියන දේට ඉහළින් යන්නෙත් නැහැ.
ඔබත් සමඟ ක්ෂේත්‍රයේ සිටින, විශේෂයෙන් රොඩ්නි වර්ණකුල, ඇන්ටන් ජූඩ් වැනි අය රංගනයට අමතරව ගායනයේ ද යෙදෙනවා. අදහසක් නැද්ද ඔවුන්ගේ කුලකයට වැටෙන්න?
මමත් ඉඳහිට ගායනයේ යෙදෙනවා. ඒත් ඔවුන්ගේ මට්ටමට ගයන්න සහ එවැනි මහා ලොකු හැකියාවක් මට නැහැ කියලයි මං හිතන්නේ. ඒත් මේ වන විට කැසට් ආයතනයකින් ගීත එකතුවක් කරන්නට මට ආරාධනාවක් ලැබුණා. ඒ ඇල්බමයට අඩංගු ගීත සියල්ලම පාහේ උපහාසාත්මක ඒවා. තවම ඒ ගැන වැඩිදුර හිතලා නැහැ.
මේ දිනවල ඔබ දකින්නට හැකි පුංචි තිරයේ නිර්මාණ ගැන කතා කළොත්?
ආදරණීය චංචලා, ද සැලුන් වැනි නාට්‍යයවලත් කතුර වැඩ සටහනෙත් මං ඉන්නවා. ඒ වගේම තව නාට්‍යය කිහිපයක් ඉදිරියේදී විකාශය වන්නටත් නියමිතයි.
‘ප්‍රියන්ත සෙනෙවිරත්න’ තව ටිකක් උස ගියා නම් හොඳයි කියලා හිතෙන්නේ නැද්ද?
අපොයි හිතෙනවා. ඒත් ලැබුණු දේවල් පිළිබඳ සතුටු වනවා හැර නොලැබිච්ච ඒවා ගැන මොකට හිතනවද? එක අතකින් මිටි වුණ එකත් හොඳයි. මං දැකලා තියනවා ආරෝහ පරිනාහ දේහ තියෙන ජනප්‍රිය ප්‍රද්ගලයන් ළඟට මිනිස්සු යන්නේ නැතිව ශරීරයෙන් කුඩා අපි වැනි අයත් එක්ක නොබියව කතා කරනවා. ඒක නිසා මගේ ශරීර කූඩුව මට ආභරණයක් වෙලයි තියෙන්නේ.

සටහන සහ සේයාරුව - ප්‍රසාද් සමරතුංග