11:41 AM
S M S Lanka
| මෙ වර අපේ කතා නායකයා වේදිකා නාට්‍ය, ටෙලි නාට්‍ය සහ සිනමාව යන ක්ෂේත්‍ර තුනේම හපන්කම් පෑ නළුවකු වූ නමුදු, ඔහුගේ කීර්තිය වඩාත් පැතිර ගියේ වේදිකාව මත ඔහු පෑ ප්‍රතිභාව හේතුවෙනි. මහැදුරු එදිරිවීර සරච්චන්ද්‍රයන් ගේ ප්‍රධාන ගෝලයකු වූ හේ සරච්චන්ද්‍රයන් ප්‍රධාන මෙරට බිහි වූ බොහෝ ප්‍රවීණ නාට්‍යකරුවන්ගේ කීර්තිමත් නිර්මාණ රැසක ප්‍රමුඛ භූමිකාවන්ට පණ පෙවීය. ඒ අතරතුර නාට්‍ය නිෂ්පාදනයට ද පිවිසි හේ මේ වන විට සාර්ථක නාට්‍ය කීපයක්ම නිෂ්පාදනය කළ ප්‍රවීණයෙකි. දිනක් ප්‍රසිද්ධ නාට්‍යයක් සඳහා කොළඹින් බොහෝ දුර බැහැර ප්‍රදේශයකට ගිය හේ අතුරු සිදුරු නැතිව පිරී ගිය 6.30 දර්ශනයෙන් පසු නාට්‍ය සංවිධායකයන් රාත්‍රී භෝජනයට පෙර පැවැත් වූ සුහද සාදයේදී මධු බඳුන් කීපයකම රස බැලුවේ නාට්‍ය ගීත කීපයකින් එහි සිටි රසිකයන් ප්‍රබෝධමත් කරමිනි. රාත්‍රී කෑමෙන් පසු බස් රථයට ගොඩ වූ අප කතා නායකයා තම සහෝදර නළු නිළියන් සමඟ එහිදී ගීතයක් දෙකක් ගැයුව ද ගමනාරම්භ කොට වැඩිදුරක් යාමට මත්තෙන් තම අසුන මත දිගා වී නින්දට වැටුණේ ‘මත’ වැඩිකමටය. නාට්‍යකරුවන් රැගත් බස් රථය කොළඹට පැමිණෙන විට මධ්‍යම රාත්‍රිය ඉක්ම ගොස් හෝරා දෙකක් පමණ ගෙවී ගොස් තිබිණි. තැන තැන ශිල්පීන් රැසක් බැස්සවීමෙන් අනතුරුව බස් රථය කොළඹින් කිලෝ මීටර් හත අටක දුරකින් පිහිටි ප්‍රාදේශීය නගරයක් බලා පිටත් වූයේ තද නින්දකට වැටී සිටි අප කතානායකයා නිවසට හැරලීම පිණිසය. නගරයේ කඩමණ්ඩිය පසු කොට මඳක් දුර ගොස් අතුරු පාරකට හැර වූ බස් රථය නාට්‍ය කණ්ඩායමේ ශිල්පියකුගේ මඟ පෙන්වීම අනුව එක් නිවෙසක් අසළ නතර විය. එම ශිල්පියා අප නළුවා වෙත ගොස් ඔහුගේ ඇඟට අත තබා මෙසේ කීවේය. ‘අයියේ ඔන්න ගෙදරට ආවා. දැන් බහින්ඩ.’ අප කතා නායකයා ඔහුගේ බසින් අවදි වන බවක් නොපෙනුණ බැවින් නාට්‍යයේ තවත් නළුවකු තම සගයා පසෙකට කොට නිදා සිටි නළුවා වෙත කිට්ටු කළේය. ‘ඒයි මචං, මේ අපි ඉන්නෙ උඹලගෙ ගේ දොරකඩ, ඉක්මනට බැහැපං. අපි ගෙදර යන්ඩත් එපායැ.’ ඔහු අපේ නළුවා සොලවමින් උස් හඬින් කීවේය. එහෙත් අපේ කථා නායකයා අවදි වන බවක් නොපෙනිණ. මේ අතර නිවසේ අය අවදි වී ලයිට් දමා නිවසේ ප්‍රධාන දොර විවෘත කරනවා පෙනුණි. එක් වරම ඉද්ද ගැසුවාක් මෙන් කෙලින් වූ අපේ නළුවා දෑස් පිස දමමින් තම නිවෙස දෙස බලා, ‘මේ අපේ ගෙදර නෙමෙයි’ යනුවෙන් පවසා නැවතත් දිගා වී නිදන්නට විය. මේ කලබලයට අප නළුවාගේ බිරිය නිවසේ ප්‍රධාන දොරෙන් මතු වී ඉදිරියට පැමිණ ගේට්ටුව හැර බස් රථය දෙස බලා සිටින්නට විය. ඒ බැව් දුටු එක් නාට්‍ය ශිල්පියකු අපේ කතා නායකයා වෙත ගොස් ඔහුගේ උරහිසට තට්ටු කොට මෙසේ කීවේය. ‘මචං මේ උඹලගෙ ගෙදර තමයි. අර උඹේ වයිෆ් බලා ඉන්නේ උඹ බහිනකං.’ අපේ නළුවා ආයෙත් නැඟිට සිටියේය. ඇස් පිස දමා තම නිවසේ ගේට්ටුව දෙස බලා ‘ඒ මගෙ ගෑනි නෙමෙයි’ යනුවෙන් පවසා හේ නැවතත් නිදන්නට විය. මඳක් ඇල වෙන්නට හැකි තරම් ඉක්මනින් තම නිවෙස් බලා යාමට නොඉවසිල්ලෙන් පසු වූ සෙසු ශිල්පීහු කර කියා ගත හැකි දෙයක් නොමැතිව බලා සිටිද්දී අප නළුවාගේ නිවසේ සුරතලයට ඇති කළ බල්ලා මහ හඬින් බුරමින් ගේට්ටුව ළඟ කැරකෙන්නට පටන් ගත්තේය. ඒ හඬින් අපේ නළුවා නැවත වරක් කෙළින් වූයේය. හොඳින් ඇස් පිස දමා තම නිවෙස දෙස බැලූ හේ ‘ඒ නම් අපේ බල්ලා!’ යනුවෙන් මහ හඬින් කියා තම බෑගය ද කරේ රුවා ගෙන බස් රථයෙන් බැස්සේය. |
Posted in: 
0 comments:
Post a Comment