ඒ ලොකේෂන් එකයි - මේ ලොකේෂන් එකයි

ඒ නිල්මිණියි – මේ නිල්මිණියි සිහින පියාපත් දර්ශන තලයේ රසමුසු කතන්දර

ම න්දාකිණිගේ සිහිනවලට තටු ඇවිත්ය. ඇය සිටියේ ඉපිළ ගිය සතුටකින්. ඇගේ ඇස් නිතරම සෙව්වේ ඔහුය.

නම පුර්ණයි. මන්දාකිණි ඉගෙන ගන්නා වෛද්‍ය විද්‍යාලයේම ශිෂ්‍යයකු වූ පූර්ණ කඩවසම් තරුණයෙකි.

පූර්ණ, මන්දාකිණිට හරිම ආදරෙයි. මන්දාකිණිත් පූර්ණට දෙවැනි නැහැ. පෙර දවසක පූර්ණ මන්දාකිණිගේ සිත් පවුරේ ඇළ වූ ස්නේහවන්ත වදන් ඇය දවසට දෙතුන් වතාවක් කියෙව්වේ නිමිහිම් නැතිවය. ගත වූයේ සුලු මොහොතකි. මන්දාකිණිගේ මේ සතුට, සොම්නස ක්ෂණයකින් කෙනෙකු උදුරා ගත්තාය. ඔහු මන්දාකිණි සිටි තැනට ඇවිත් යම් කිසි උපදෙස් වගයක් දුන්නේය. මන්දාකිණි ද හිස සලමින් එයට අවනත විය. ඔහු කවුද? ඒ ටෙලි නාට්‍යය සහ චිත්‍රපට අධ්‍යක්ෂ සඳුන් රාජකරුණාය. මා සිටින්නේ ඔහුගේ නවතම ටෙලි නාට්‍ය වන සිහින පියාපත් රූගත කෙරෙන භූමියෙයි. සතියේ සෑම දිනකම රාත්‍රී 8.30 ට ස්වාධීන රූපවාහිනියේ විකාශය වන සිහින පියාපත් සඳුන්ගේ තෙවැනි ටෙලි නාට්‍යය අධ්‍යක්ෂණයයි. ඉතින් මට අවසරයි, ආදරණීය චංචලා යන ටෙලි නාට්‍ය සහ උත්තරා සිනමාපටය ඔහු මීට ප්‍රථම නිර්මාණය කොට තිබිණි.

හිස් අහස දෙස බලාගෙන මන්දාකිණි කල්පනාවකය. මම ඇයගේ දැහැන බිඳ දැමුවෙමි. උදාරි වර්ණකුලසූරිය සිහින පියාපත් හි මන්දාකිණි වන්නීය.

කට්ටිය උදාරිට පොඩි මඩක් ගැහැව්වා.

ඒ මොකක්ද?

ලොකේෂන් එකට ආපු වෙලාවේ ඉඳලා ඉවක් බවක් නැතිව ඈනුම් යවනවා කියලා.

ඔව් අනේ මාර කේස් එක. ඒක දැන් පුරුද්දකට ගිහිල්ලා. ලොකේෂන් එකට ඇවිත් සීන් එකක් ඉවර වුණාට පස්සේ වැඩිපුර විවේකයක් ලැබුණොත් හරිම කම්මැලියිනේ. ඒ නිසා වෙන්න ඇති.

උදාරි, ඇත්ත තතු පැහැදිලි කළාය.

මොකද මේනක පේන්න නැත්තේ?

සඳුන්ගෙන් මම ඇසුවෙමි.

සාමාන්‍යයෙන් වෙලාවට එන්න ඕනේ. ඒත් අද ටිකක් පරක්කුයිනේ.

ඒ සමඟම සඳුන්ට දුරකතන ඇමතුමක්. ඒ කතාබහේදී මේනකගේ නම දෙතුන් වතාවක් පිට විණ.

නියම වැඩක් වෙලා තියෙන්නේ. මගේ ආදරණීය චංචලා එකත් මේ දවස්වල ෂූට් කරනවනේ. මේනකව ලොකේෂන් එකට ගේන්න කියපුවහම ඩ්‍රයිවර් මහත්තයා මේ ලොකේෂන් එක වෙනුවට චංචලා ලොකේෂන් එකට ගෙනහිල්ලා. සෑහෙන්න වෙලාවක් එතන ඉඳලා වටපිටාවේ කවුරුවත් නැති හින්දලු කතා කළේ. මේනකත් වෑන් එකේ නිදිලු. මං කිව්වා ඒ ලොකේෂන් එක නෙවෙයි සිහින පියාපත් ලොකේෂන් එකට එන්න කියලා.

ඔය වගේම තව වැඩක් වුණානෙ. සඳුන් තවත් රස කතාවකට මුල පිරුවේය.

සිහින පියාපත් නාට්‍යයේ නිල්මිණිලා දෙන්නෙක් රඟපානවා. ඒ නිල්මිණි තෙන්නකෝන් හා නිල්මිණි බුවනෙකයි. නිල්මිණි බුවනෙකව ගේන්න වාහනේ යැව්වා. අපි සීන් එකට රෙඩි වෙලා බලාගෙන ඉන්නවා ඉන්නවා වාහනේ නැහැ. බැලින්නම් වාහනේ ගිහිල්ලා තියෙන්නේ නිල්මිණි තෙන්නකෝන්ගේ ගෙදරට. අපෙත් වැරැද්ද. කිව්වේ නිල්මිණිව ගේන්න මිසක් මොන නිල්මිණි ද කියලා කිව්වේ නැහැනේ.

ස්වල්ප වේලාවකින් මේනක සහ ශලනි තාරකා පැමිණියහ. අයිරාංගනී සේරසිංහ, විල්සන් ගුණරත්න, නිල්මිණි තෙන්නකෝන්, ප්‍රියන්ත සෙනෙවිරත්න, ජනක කුඹුකගේ දර්ශන තලයේය.

ප්‍රියන්ත , සිහින පියාපත් හී ප්‍රධාන චරියක් වන කුලසේකර යුවළෙහි නිවස බලා කියා ගන්න විලියම්ය. කුලසේකර මහත්මිය ලෙස රඟන නිල්මිණි තෙන්නකෝන්ගේ සහ ප්‍රියන්ත රඟපෑ රාත්‍රී දර්ශනයක් රූ ගැන් වූයේ පෙර දවසකය.

මිසිස් කුලසේකර රාජකාරී නිමා වී සිය වාහනයෙන් නිවසට පැමිණෙයි. විලියම් පැමිණ නිවසේ ගේට්ටුව විවෘත කරයි. ප්‍රියන්ත, නිල්මිණිට පුංචි විහිලුවක් කිරීමේ අදහසක් පහළ විය. දර්ශනය මඳකට නැවතුණ තැන නිල්මිණි වාහනයෙන් බැස ගිය ඇසිල්ලේ ප්‍රියන්ත කාටත් හොරා එම වාහනේ පිටුපස දොර ඇරගෙන එයට රිංගා ගත්තේය.

එහි ඉතිරිය ප්‍රියන්තටම පවසන්නට මම ඉඩ දුන්නෙමි.

ආයේ සීන් එක ගනිද්දී නිල්මිණි වාහනයට නැග්ගා. මම එක පාරම ටිකක් සැර කට හඬකින් ‘නෝ . . .නා’ කිව්වා. නිල්මිණි කොච්චර බය වුණා ද කිව්වොත් ඇය කෑගහපු සද්දෙට මම නිල්මිණිට වඩා බය වුණානේ.

නිල් අහස වගේ සදරැල් පිරී

ඇස්වහක් නොවී හසරැල් නිතී

පෙනි පෙනි නොපෙනී යන ඔබ කවුදෝ

ඔබ කවුදෝ මන්දාකිණියේ

සමනල් සිහිනෙන් අවදි වුණා

ඔබෙ ආදර දෙව්දූ

සිහින පියාපත් ආදරණීයයි . . .

මා සිහින පියාපත් දර්ශන තලයෙන් සමුගෙන යන්නට හදද්දී කාගෙදෝ දුරකතනයකින් සිහින පියාපත්හී තේමා ගීතය වාදනය වනු ඇසිණ.

සිහින පියාපත්හි සෙසු නළු නිළි පිරිවර:

සනත් විමලසිරි, අංජලී ලියනගේ, ධර්මපි‍්‍රය ඩයස්, පුබුදු ගමගේ, ප්‍රසන්නජිත් අබේසූරිය, කුසුම් පෙරේරා, උදයංගනී සමන් කුමාරි, සංජුල දිවාරත්න, ඉරේෂා සඳමිණි.

අධ්‍යක්ෂ - සඳුන්

නිෂ්පාදන කණ්ඩායම:

කැමරාකරණය - මංජුල රෙෂාන්

කලා අධ්‍යක්ෂණය - සම්පත් වන්නිආරච්චි

සහය අධ්‍යක්ෂණය – නුවන් ප්‍රියන්ත

සංස්කරණය - සමීර මධු කිඳෙල්පිටිය

නිෂ්පාදන විධායක – ලලිත් වසන්ත, නීල් රුක්මන්, චන්න ජයනාත්

රචනය - සනත් සමරනායක

සංගීතය - ශාන්ත ජයලත් තිසේරා

නිෂ්පාදනය – නිල්වලා එන්ටර්ටේන්මන්ට් වෙනුවෙන් දේශමාන්‍ය ආචාර්ය උපුල් ජයසිංහ

- ප්‍රසාද් සමරතුංග

Sarasaviya

Posted in: ගොසිප්,ජීවිත විත්ති,ටෙලි