6:10 PM
S M S Lanka
උත්තරීතර කුටුම්භය තුළ පතිනි භාව රකින්නී ඈ...
භාර්යාවෝ ඇරැඹුණු මොහොත
"භාර්යාවෝ" ටෙලි වෘතාන්තයේ මුහුරත් උළෙල පසුගියදා සිලෝන් කොන්ටිනෙන්ටල් හෝටලයේදී පැවැත්විණි.
මෙම උත්සවයේ ප්‍රධාන ආරාධිතයන් වශයෙන් ඉදිකිරීම්, ඉංජිනේරු සේවා නිවාස හා පොදු පහසුකම් ඇමැති විමල් වීරවංශ, ඉන්ද්‍රානී වීරතුංග, පාර්ලිමේන්තු මන්ත්‍රී මාලනී ෆොන්සේකා, රවීන්ද්‍ර රන්දෙනිය යන මහත්ම මහත්මීහු ඇතුළු කලාකරුවන් විශාල පිරිසක්‌ මෙම අවස්‌ථාවට එක්‌ව සිටියහ.
අත්විඳින ජීවිත අත්දැකීම් නූතන භාර්යාවන් විනිවිද නිර්මාණය වන මෙම ටෙලි වෘතාන්තයෙහි කතා සංකල්පය ශෂී වීරවංශගෙනි. අධ්‍යක්‍ෂණය සාරංග මෙන්ඩිස්‌a වෙතිනි. සුධර්මා නෙත්තිකුමාර භාර්යාවෝහි නිෂ්පාදිකාවයි.
ජීවන් කුමාරතුංග, සබීතා පෙරේරා, කාංචනා මෙන්ඩිස්‌, දිල්හානි අශෝකමාලා, දුලීකා මාරපන, නිමන්ති පෝරගේ, ලකී ඩයස්‌, මේනකා රාජපක්‍ෂ, කුමාර තිරිමාදුර, උමයංගනා වික්‍රමසිංහ, සහන් රන්වල රංගනයෙන් දායක වෙති.
නිරෝෂා විරාජිනි ගයන මෙහි එන ගීතය රචනා කර ඇත්තේ ශෂී වීරවංශ (ඇමැති විමල් වීරවංශ බිරිඳ) විසිනි. ප්‍රභාත් රොෂාන් කැමරාකරණයෙන්ද, ඊ. ඩබ්. විඡේසිංහ වෙස්‌ ගැන්වීමෙන්ද දායක වී ඇත.
"භාර්යාවෝ" ටෙලි වෘත්තාන්තයේ කතාව මෙන්ම එහි තේමා ගීතයද ලියනු ලැබූ ශෂී වීරවංශ ඊට පසුබිම් වූ කතාව පිළිබඳව අපට අදහස්‌ දක්‌වමින් මෙලෙස ප්‍රකාශ කළාය. "විවාහයෙන් පස්‌සේ අපි කවුරුත් වැඩිපුරම ඇසුරු කරන්නේ විවාහක බිරින්දෑවරු. මේ බිරින්දෑවරු කතා කරන විට අපට ඇසෙන ජීවිතය පිළිබඳ විවරණයන් ඉතා සංකීර්ණයි. විශේෂයෙන් නූතනයේ තාක්‌ෂණික පෙරළියත් සමග අපේ සමාජ හර පද්ධතීන් වලට මෙන්ම පවුල් ජීවිතවලට එල්ල කරන බලපෑම් විවිධාකාරය.
මේ නූතන පවුල් ජීවිත තුළ බිරින්දෑවරු මෙන්ම ස්‌වාමි පුරුෂයන්ද දරුමල්ලන්ද විවිධ අත්දැකීම්වලට මුහුණ දෙනවා. ඉතා යහපත් ස්‌වාමි පුරුෂයන් නිසා ඉතා සතුටින් පවුල් ජීවිත ගත කරන බිරින්දෑවරුත් අපට හමුවෙනවා. සමහර බිරින්දෑවරු නිසා දුක්‌විඳින ස්‌වාමිපුරුෂයන් විඳින ප්‍රශ්නත් අපට අසන්න ලැබෙනවා. මේ සියල්ල සමග බිරින්දෑවරුගේත්, ස්‌වාමි පුරුෂයන්ගේත් ජන්ම ගති පැවතුම් නිසා හැලහැප්පිලිවලට මුහුණ දෙමින් දරු මල්ලන් සමග ජීවිතය ගෙන යන භාර්යාවෝ අපට සමාජයේ හමුවෙනවා.
ආසියාතික ගැහැනිය ලෙස අප හඳුනන ජීවිත සීමා මායිම් තුළ සිරවී සියලු ප්‍රශ්න විඳ දරාගෙන දුක්‌ කම්කටොලු මැද දරුවන් උදෙසාම ජීවිතයට මුහුණ දෙන කාන්තාවන් භාර්යාවන් සියල්ල සිතින් විඳ දරාගෙන පිටට නොකියන සාමාජීය හා ආර්ථීක වෙනත් ප්‍රශ්න මැද ගතකරන ජීවිතය ගැන අප කතා කරන අවස්‌ථා විරලයි. ආසියාතික ගැහැනිය නමැති සීමා මායිම් වටා කොටුකර තිබෙන පවුරින් එහාට ගොස්‌ ඔවුන්ගේ ජීවිතය විනිවිද දකින්නයි "භාර්යාවෝ" ටෙලි වෘත්තාන්තය කරන්න මා උත්සහ කරන්නේ.
මගේ සිතේ උපන් මේ කතාව කලාත්මක නිර්මාණයකින් ජනතාව ඉදිරියට තබන්න මම සුධර්මා නෙත්තිකුමාර මහත්මියට යෝජනා කළ විට ඇය එක හෙළාම ඊට කැමැත්ත පළ කළා. ඇය ඒ වනවිට ටෙලි නාට්‍යක්‌ කරන්න කතා වස්‌තුවක්‌ සොයමින් සිටියා. "ගඟ අද්දර" ටෙලි වෘත්තාන්තයක්‌ නිපදවූ ඇය ඉතා සතුටින් "භාර්යාවෝ" නිපදවන්න ඉදිරිපත් වීම මට පමණක්‌ නොව සමස්‌ත භාර්යාවන්ටම මහත් සතුටක්‌. භාර්යාවෝ හි එන අර්ථවත් තේමා ගීතය ශෂී වීරවංශ විසින් ලියා තිබේ. ශෂී සතු ප්‍රතිභාව පළකරමින් ඇය ලියූ නිරෝෂා විරාජිනී ගයන ගීතය සංගීතවත් කර ඇත්තේ නවරත්න ගමගේ ප්‍රවීණ සංගීතවේදියාණන් විසිනි. එම ගීතය ද මේ සමග දැක්‌වේ.
භාර්යාවෝ
දස පෙරුම් පුරා - පතිකුලය අරා
පෙරහැරේ යන්න - සුබ මඟුල් පතා
සොඳුරු ලලනාවී ඈ සොඳුරු ලලනාවී....
සත් ගුණෙන් යුතුව - මෙත් සිතින් බැඳෙන
යුග දිවිය පුරා - මිණි බඳුන
රකින ඈ
නාග කන්‍යාවී ඈ නාග කන්‍යාවී...
විඳින මනසට විඳින්නට හැර
කර්ම ද්වාරය හැර තබා
උත්තරීතර කුටුම්භය තුළ
පතිනිභාවය රකින්නී ඈ...
සසර පුරුදු ලෙස පෙරුම් පුරනා
යශෝදරාවී ඈ කින්නරා වී ඈ...
චෝර වධකය ස්‌වාමි වෙස්‌ගෙන
ජීවිතයෙ දොර අගුලු ලා
අන් සතු පෙම් උයන් වනසා...
එහිම නිරයක්‌ මවන්නී...
සතර අගතියෙ ගතිය මවනා
අපුල රුදුලිය ඈ...
කුරිරු රතැසිය ඈ...
මාතු භාර්යා, භගිනි භාර්යා, සකිනි භාර්යා, දාසි භාර්යා,
චෝර භාර්යා, වධක භාර්යා, ස්‌වාමි භාර්යා සප්ත භාර්යාවෝ///
පද රචනය - ශෂී වීරවංශ
සංගීතය - නවරත්න ගමගේ
ගායනය - නිරෝෂා විරාජිනී
ශෂී වීරවංශ
සටහන-කළ්‍යාණි පී නිශ්ශංක
පින්තූර- ධම්මික සල්වතුර
Copy Rights - Divayina
Posted in: 
-
0 comments:
Post a Comment