6:03 PM
S M S Lanka
‘ජොනී ඉංග්ලිෂ්’ ආයෙත් ඇවිදින් Jhonny English Reborn
වසර 2003 දී බ්‍රිතාන්‍යයෙන් ජේම්ස් බොන්ඩ් වර්ගයේ ප්‍රහසනමය ක්‍රියාදාම චිත්‍රපටයක් නිර්මාණය වූයේය. එහි ජොනී ඉංග්ලිෂ් නමැති සුපිරි ඔත්තුකරුවාගේ චරිතය රඟපෑවේ විකට නළුවකු ලෙස ‘මිස්ටර් බීන්’ චරිතය රඟපාමින් ලොව පුරා ජනප්‍රිය වූ රෝවන් ඇට්කින්සන්ය. ඔහු ඊට දශක දෙකකට පෙර නිල වශයෙන් බොන්ඩ් චිත්‍රපට පෙළට ඇතුළත් නොවූවත්, බොන්ඩ් චිත්‍රපටයක් වූ ෂෝන් කොනරි ප්‍රධාන චරිතය රඟපෑ, ‘නෙවර් සේ - නෙවර් අගේන්’ චිත්‍රපටයේ ද රඟපා තිබිණි. ‘ජොනී ඉංග්ලිෂ්’ නමැති එම චිත්‍රපටය ලොව පුරා ප්‍රදර්ශනය වෙමින් ඩොලර් ලක්ෂ 1600ක් ඉපැයුවේය.
එම චිත්‍රපටයේ දිගුවක් ලෙස නිර්මාණය වූ ‘ජොනී ඉංග්ලිෂ් රීබෝන්’ මේ වනවිට ශ්‍රී ලංකාවේ ද ලොව පුරා ද ප්‍රදර්ශනය වෙමින් තිබේ.ජාත්‍යන්තර ඝාතකයන් පිරිසක් ලෝක නායකයකු මරා දමා මහත් විනාශයක් කිරීමට සැලසුම් කරති. බ්‍රිතාන්‍ය ඔත්තු සේවාවේ අරමුණ වූයේ එම විනාශය වැළැක්වීමය. මේ වනවිට MI 7 ඔත්තු සේවයේ සුපිරි ඔත්තුකරුවා වූ ශ්‍රීමත් ජොනී ඉංග්ලිෂ් ආසියාකරයේ පිටිසර ගම්මානයක විවේකීව කාලය ගත කරමින් සිටියි. එහෙත් ඔහුගේ නායකයන් වහා ඔහුව සේවයට කැඳවන්නේ ජාත්‍යන්තර ඝාතකයන් චීන අගමැතිවරයා ඝාතනය කිරීමට දරන තැත පරාජය කිරීම සඳහාය.
ජාත්‍යන්තර ඝාතකයන් කටයුතු කරන්නේ කේ.ජී.බී., සී.අයි.ඒ. සහ බ්‍රිතාන්‍යයේ MI 7 ඔත්තු සේවා අසරණ කරමිනි.
එහෙත් සම්මත ඔත්තු සේවා නිලධාරීන්ගේ උපක්‍රම හා දක්ෂතා පිළිබඳ විමසිලිමත්වන ඔවුන් අසම්මත ඔත්තුකරුවකුගේ මැදිහත්වීමක් කිසිසේත් අපේක්ෂා කරන්නේ නැත.
එම අසම්මත ඔත්තුකරුවා ශ්‍රීමත් ජොනී ඉංග්ලිෂ්ය.
රෝවන් ඇට්කින්ස් ගේම තිර රචනයක් වන ‘ජොනී ඉංග්ලිෂ් රීබෝන්’ ඔලිවර් පාකර් ගේ අධ්‍යක්ෂණයකි. රෝවන් ඇට්කින්සන්, ගිලියන් ඇන්ඩර්සන්, රොස්මන්ඩ් පයික්, මාෂා ෆට්සලාන්, ඩොමිනික් වෙස්ට් ඇතුළු නළු නිළියෝ මෙහි රඟපාති.
මිස්ටර් බීන් මෙන් ප්‍රකට රෝවන් ඇට්කින්සන්හට ජොනී ඉංග්ලිෂ් නමැති අසම්මත සුපිරි ඔත්තුකරුවා ලෙස ජාත්‍යන්තර ඝාතකයන් පරාජය කිරීමට හැකිවේද?
හාස්‍යය හා ත්‍රාසය නොමඳව ඇතුළත් ‘ජොනී ඉංග්ලිෂ් රී බෝන්’ පවුලේ සැමට එක්ව රස විඳිය හැකි චිත්‍රපටයකි.
Posted in: 
0 comments:
Post a Comment